Creu cadernid yn y gweithle

Cofnodwyd yn: Blog

‘Cadwch yn Dawel a Pharhewch’ yw sut y cafodd cartrefi Prydain eu hannog i ymdopi ag amddifadedd yr Ail Ryfel Byd ac mae’r un neges o gadernid yn wyneb pwysau a straenau byw yn yr oes modern wedi dod yn ymadrodd poblogaidd heddiw.

Serch hynny, er gwaethaf yr agwedd ddifyr hon i’r galwad i barhau beth bynnag yw’r sefyllfa, mae Sefydliad Iechyd y Byd wedi enwi straen ‘epidemig iechyd yr unfed ganrif ar hugain’ ac mae cyflogwyr a gwneuthurwyr polisi’n cymryd ystraen, gorbryder ac iselder sy’n effeithio ar aelodau gwerthfawr o’r gweithlu’n llawer mwy difrifol.

Bob blwyddyn collir nifer a amcangyfrifir o 17 miliwn o ddiwrnodau gwaith i straen, gorbryder ac iselder, yn ôl y Sefydliad Iechyd Meddwl. Mae cyflogwyr yn cydnabod fwyfwy y difrod y gall straen ei wneud yn y gweithle, gan gynnwys:

  • colli cynhyrchiant oherwydd absenoldeb staff;
  • mwy o lwythi gwaith i weithwyr sy’n gorfod ymdrin â gwaith eu cydweithwyr;
  • trosiant uwch o staff.

Mae llawer o gyflogwyr eisiau lleihau straen yn y gweithle gan ddefnyddio nifer o ddulliau megis adolygu llwythi gwaith, cynnig gweithio hyblyg neu fynd i’r afael â diwylliant  gweithle a allai annog oriau hir heb egwyliau. Ffordd arall o gefnogi gweithwyr yw cymryd camau i’w helpu i roi hwb i’wcadernid yn erbyn straen.

Beth yw cadernid?
Cadernid yw gallu rhywun i:

  • addasu i drallod;
  • cynnal eu cydbwysedd;
  • cadw rhyw synnwyr o reolaeth ar eu hamgylchedd;
  • symud ymlaen mewn modd positif.

Mae rhai pobl yn ymdopi â sefyllfaoedd ingol yn well nag eraill, yn bennaf oherwydd eu bod yn gadarnach. Mae’r bobl hyn yn ffynnu tra bod eraill o’u cwmpas yn gwanhau o dan y pwysau. Ond y newyddion da yw nad yw cadernid yn endid sefydlog ac nad yw’n rhywbeth y caiff rhywun eifwynhau’n naturiol, neu beidio. Gellir ei addysgu ac mae’r gweithle yn lle delfrydol i bobl ddysgu i adeiladu eu cadernid.

Beth sy’n bygwth cadernid ac iechyd meddwl yn y gweithle?

Gall gweithleoedd modern gyflwyno sawl her, gan gynnwys rhai sefyllfaoedd negyddol:

  • Llwyth gwaith gormodol.
  • Diffyg annibyniaeth.
  • Ailstrwythuro sefydliadol.
  • Diffyg cymorth gan reolwyr neu waith tîm.

Mae gweithleoedd yn newid yn gyflym oherwydd globaleiddio, a gall y newidiadau hyn gyflwyno straen hefyd:

  • Cwsmeriaid rhyngwladol a sefydliadau partner mewn parthau amser gwahanol – diwedd i oriau gwaith sefydlog ac amser segur.
  • Dirywiad y ‘swydd am oes’ – mae pobl yn dod yn fwy dethol am y swyddi a’r amgylcheddau maent yn gweithio ynddynt.
  • Technolegau newydd sy’n golygu bod rhaid i sgiliau ac arbenigedd gael eu diweddaru’n gyson.

Sut y gall cyflogwyr helpu i gynyddu cadernid

Mae nifer o bethau y gall cyflogwyr eu gwneud i helpu i greu cadernid ymhlith staff.

Annog lles corfforol. Mae iechyd corfforol yn hanfodol i’n hiechyd meddwl, a gall creu amgylchedd gweithio dymunol a hybu ymddygiad iach gyflwyno llawer o fanteision. Rhai syniadau:

  • Bwyta’n iach –darparu ffrwythau ar gyfer byrbrydau.
  • Ymarfer – cynlluniau beicio i’r gwaith.
  • Rhoi’r gorau i smygu –cynnig cymorth cwnsela.
  • Yfed yn synhwyrol –newid y diwylliant yfed.

Hyrwyddo amgylchedd seicolegol iach. Gwneud y gweithle’n amgylchedd dymunol a hapus:

  • Hyrwyddo dull rheoli agored ac ymddiriedus.
  • Hyfforddi rheolwyr i ystyried lles meddyliol y staff.
  • Darparu diogelwch swydd a cheisiwch osgoi ailstrwythuro neu newid ar raddfa fawr yn rheolaidd.
  • Gwneud swyddi’n amrywiol a diddorol a rheoli llwythi gwaith.
  • Hyfforddi staffmewn sgiliau newydd.
  • Cynnig hyfforddiant i ddelio â straen.
  • Caniatáu annibyniaeth a gadael i unigolion wneud eu swyddi.
  • Cynnig triniaeth deg.
  • Gwobrwyo gwaith da.
  • Cynnig trefniadau gweithio hyblyg.

Darparu cymorth arbenigol i helpu i gynnal iechyd corfforol a meddyliol da. Weithiau mae pobl angen cymorth arbenigol â materion iechyd corfforol neu feddyliol ac efallai y bydd angen eu hatgyfeirio i gael rhagor o gymorth, er enghraifft:

  • iechyd galwedigaethol;
  • adnoddau dynol;
  • cwnsela;

Hyrwyddo cyfathrebu agored a rhwydweithiau cymdeithasol cryf. Mae pobl yn ffynnu ar gyfeillgarwch a rhyngweithio cymdeithasol da, ac mae pobl sydd â pherthnasau positif yn y gweithle’n fwy tebygol o fwynhau dod i’r gwaith a bod yn gynhyrchiol pan fyddant yn cyrraedd yno. Gall y dilynol fod o gymorth:

  • Annog gwaith tîm.
  • Rheolwyr cydymdeimladol.
  • Dyddiau tîm a digwyddiadau cymdeithasol gyda’r gwaith.

Sut y gall gweithwyr eu helpu eu hunain

Gall gweithwyr eu helpu eu hunain hefyd i fod yn gadarnach yn y gwaith. Erbyn hyn mae llawer o arbenigwyr yn gweld nodweddion cyffredin ymhlith y rhai sy’n arddangos y cadernid mwyaf, gan gynnwys synnwyr cryf o bwrpas yn yr hyn maent yn ei wneud ac agwedd bositif ond realistig.

Mae dulliau eraill o greu cadernid yn cynnwys:

  • Creu a chynnal cyfeillgarwch a pherthnasau teuluol da – mae rhyngweithio cymdeithasol a chymorth yn hanfodol i iechyd meddwl da.
  • Bod yn gadarnhaol – gweld problemau fel proses ddysgu bosibl yn hytrach na mynydd arall i’w ddringo.
  • Cadw persbectif – peidio â throi drama’n argyfwng. Bydd sut mae pobl yn ymateb i sefyllfaoedd yn penderfynu pa mor dda maent yn ymdopi’n emosiynol.
  • Meithrin hunan-ganfyddiad positif – gan bwysleisio inni’n hunain y pethau a wnawn yn dda a bod yn garedig inni’n hunain.
  • Cymryd amser i fagu nerth newydd – cymryd egwyliau rheolaidd, gadael y gwaith yn brydlon a chymryd gwyliau.
  • Ymarfer ymwybyddiaeth ofalgar a myfyrdod fel offeryn i wynebu a rheoli straen

 

Cymorth gan Ffit i Weithio

Gellir ceisio cymorth a chyfarwyddyd ynghylch gwaith ac iechyd gan Ffit i Weithio, sy’n cynnig cyngor a chyfarwyddyd cysylltiedig â gwaith ynghylch iechyd ar-lein am ddim i unrhyw un sy’n chwilio am gyngor a chymorth am achos presennol o absenoldeb oherwydd salwch, neu am faterion a allai arwain at absenoldeb oherwydd salwch. Gellir atgyfeirio pobl sydd wedi bod i ffwrdd o’r gwaith oherwydd salwch am bedair wythnos neu fwy am asesiad ffôn gyda rheolwr achos Ffit i Weithio er mwyn nodi’r holl rwystrau sy’n atal y person rhag dychwelyd i’r gwaith. Hefyd gall y rheolwr achos Ffit i Weithio ddarparu argymhellion ynghylch sut y gellir mynd i’r afael â’r rhwystrau ac o bosibl galluogi’r person i ddychwelyd i’r gwaith yn gynnar. Ewch i’r wefan Ffit i Weithio neu ffoniwch y llinell gyngor ffôn ar 0800 032 6235 (Saesneg) neu 0800 032 6233 (Cymraeg). Mae gwasanaeth ar wahân yn rhedeg yn yr Alban (0800 019 2211).

Leave a Reply

Your email address will not be published. Required fields are marked *